English| മലയാളം

ആമുഖം

ആലപ്പുഴ ജില്ലയില്‍ അമ്പലപ്പുഴ താലൂക്കിലാണ് ആലപ്പുഴ നഗരസഭ സ്ഥിതി ചെയ്യുന്നത്. പഴവീട്, മുല്ലയ്ക്കല്‍ , ആലപ്പുഴ പടിഞ്ഞാറ്, ആര്യാട് തെക്ക് എന്നീ വില്ലേജുകളിലായി വ്യാപിച്ചുകിടക്കുന്ന ആലപ്പുഴ നഗരസഭയ്ക്ക് 46.77 ചതുരശ്ര കിലോമീറ്റര്‍ വിസ്തീര്‍ണ്ണമുണ്ട്. വടക്കുഭാഗത്ത് ആര്യാട് പഞ്ചായത്തും, കിഴക്കുഭാഗത്ത് പള്ളാത്തുരത്തി ആറും, തെക്കുഭാഗത്ത് പുന്നപ്ര പഞ്ചായത്തും, പടിഞ്ഞാറുഭാഗത്ത് അറബിക്കടലുമാണ് ആലപ്പുഴ നഗരസഭാപ്രദേശത്തിന്റെ അതിരുകള്‍ . ആലപ്പുഴ നഗരം തീരസമതല പ്രദേശത്താണ് സ്ഥിതി ചെയ്യുന്നത്. തലങ്ങും വിലങ്ങും തോടുകളുള്ള ആലപ്പുഴ “കിഴക്കിന്റെ വെനീസ്” എന്ന അപരനാമത്തിലും അറിയപ്പെടുന്നു. സഞ്ചാരികളുടെ പറുദീസയായ ഇവിടം കെട്ടുവള്ളങ്ങളുടെ നാടെന്ന നിലയില്‍ പ്രസിദ്ധവുമാണ്. കേരളത്തിലെ പ്രമുഖ മത്സ്യബന്ധനകേന്ദ്രവും പുരാതന തുറമുഖ നഗരവുമാണ് ആലപ്പുഴ. വിവിധയിനത്തിലുള്ള അപൂര്‍വ്വയിനം കടല്‍ ‍- കായല്‍ മത്സ്യവിഭവങ്ങള്‍ ഈ നാടിന്റെ പ്രത്യേകതയാണ്. പടിഞ്ഞാറു നിന്നും കിഴക്കോട്ട് പൊതുവേ ചരിവുള്ളതും സമതലവുമാണ് ആലപ്പുഴ നഗരം. സമുദ്രനിരപ്പില്‍ നിന്നുള്ള ഏറ്റവും കൂടിയ ഉയരം 3 മീറ്ററാണ്. പ്രധാനമായും മൂന്ന് തരത്തിലുള്ള മണ്ണിനങ്ങള്‍ ഇവിടെ കാണപ്പെടുന്നു. പൂഴിമണല്‍ നിറഞ്ഞ കടപ്പുറം പ്രദേശവും, എക്കല്‍ കരിമണ്ണ് നിറഞ്ഞ കുട്ടനാടന്‍ പ്രദേശവും, ചതുപ്പു പ്രദേശങ്ങളും ഇവിടുത്തെ ഭൂപ്രകൃതിയുടെ സവിശേഷതയാണ്. “ആഴിയുടെയും പുഴകളുടെയും” അഥവാ “അറബിക്കടലിന്റെയും, മദ്ധ്യകേരളത്തില്‍ നിന്നൊഴുകിയെത്തുന്ന പുഴകളുടെയും” ഇടയില്‍ സ്ഥിതി ചെയ്യുന്ന പ്രദേശം എന്ന അര്‍ത്ഥത്തിലാണ് ഈ പ്രദേശത്തിന് ആലപ്പുഴ എന്ന പേര്‍ ലഭിച്ചതെന്ന് കരുതപ്പെടുന്നു. ചരിത്രത്തില്‍ അതിപ്രധാനമായ സ്ഥാനം പല കാര്യങ്ങളിലും കൈയ്യാളുന്ന നഗരമാണിത്. ആലപ്പുഴ തുറമുഖവും നഗരവും നിര്‍മ്മിക്കുകയും ഈ നഗരത്തെ ഒരു പ്രമുഖ വാണിജ്യകേന്ദ്രമാക്കി വളര്‍ത്തുകയും ചെയ്തത് തിരുവിതാംകൂര്‍ ദിവാനായിരുന്ന രാജാ കേശവദാസ് ആയിരുന്നു. ആലപ്പുഴയുടെ വ്യവസായവളര്‍ച്ചയ്ക്ക് രാജാ കേശവദാസും വേലുത്തമ്പിദളവയും നല്‍കിയ സംഭാവനകള്‍ മറക്കാവതല്ല. “കപ്പലുകള്‍ ഏത് കാലാവസ്ഥയിലും സുരക്ഷിതമായി നങ്കൂരമുറപ്പിച്ച് നിര്‍ത്തുവാനും, ചരക്കുകള്‍ ഭദ്രമായി നിര്‍ബാധം കയറ്റിറക്ക് നടത്തുവാനും ഏറ്റവും അനുയോജ്യമായ തുറമുഖം” എന്നാണ് 1901-ലെ സെന്‍സസ് റിപ്പോര്‍ട്ടില്‍ ആലപ്പുഴയെക്കുറിച്ച് രേഖപ്പെടുത്തിയിട്ടുള്ളത്. വാര്‍ത്താവിനിമയ ബന്ധങ്ങള്‍ക്ക് തിരുവിതാംകൂര്‍ പ്രദേശത്ത് ആദ്യമായി തുടക്കം കുറിച്ചത് ആലപ്പുഴയിലാണ്.

 

പൊതുവിവരങ്ങള്‍
ജില്ല                                  : ആലപ്പുഴ 
വിസ്തീര്‍ണ്ണം                       : 46.77 ച.കി.മി
കോഡ്                               : M040500 
വാര്‍ഡുകളുടെ എണ്ണം            : 52  
ജനസംഖ്യ                            : 177079
പുരുഷന്മാര്‍‍                       : 85708
സ്ത്രീകള്‍‍                            : 91371
ജനസാന്ദ്രത                           : 3735
സ്ത്രീ : പുരുഷ അനുപാതം     : 1038
മൊത്തം സാക്ഷരത                 : 93.2
സാക്ഷരത (പുരുഷന്മാര്‍ )       : 96.4
സാക്ഷരത (സ്ത്രീകള്‍ )            : 90.2
Source : Census data 2001